തിരുവനന്തപുരം: രാഹുല്‍ മാങ്കൂട്ടത്തില്‍ എംഎല്‍എയെ അനുകൂലിച്ച് മുഖപ്രസംഗം എഴുതിയതില്‍ വീക്ഷണം പത്രത്തിന് വീഴ്ച സംഭവിച്ചെന്ന് മാനേജിംഗ് ഡയറക്ടര്‍ ജെയിസണ്‍ ജോസഫ് റിപ്പോര്‍ട്ടറിനോട്. രാഹുലിനെ അനുകൂലിച്ച് ലേഖനം വന്നതില്‍ വീക്ഷണത്തിന് ജാഗ്രതക്കുറവ് ഉണ്ടായി. പാര്‍ട്ടി ലൈന്‍ അതല്ല. പാര്‍ട്ടി സസ്‌പെന്‍ഡ് ചെയ്ത ഒരാളെ ന്യായീകരിക്കേണ്ട ബാധ്യത പാര്‍ട്ടിക്കില്ല. ജാഗ്രതക്കുറവ് ഗൗരവമായി കാണുന്നുവെന്നും ജെയിസണ്‍ ജോസഫ് പറഞ്ഞു. കോണ്‍ഗ്രസ് മുഖപത്രമാണ് വീക്ഷണം.
മുഖപ്രസംഗം എഴുതിയ മാധ്യമ പ്രവര്‍ത്തകനെതിരെ നടപടിയുണ്ടാകുമെന്നും ജെയിസണ്‍ പറഞ്ഞു. രാഹുലിനെതിരായ കേസില്‍ നിയമം നിയമത്തിന്റെ വഴിക്ക് പോകട്ടെയെന്നും അദ്ദേഹം കൂട്ടിച്ചേർത്തു.
മുഖപ്രസംഗത്തിൽ പ്രതിപക്ഷ നേതാവ് വി ഡി സതീശന്‍ അതൃപ്തി അറിയിച്ചിരുന്നു. തനിക്കറിയില്ല, എഴുതിയവരോട് ചോദിക്കണം എന്നായിരുന്നു വിഷയത്തിൽ പ്രതികരണം തേടിയ മാധ്യമപ്രവർത്തകരോട് വി ഡി സതീശന്‍ പറഞ്ഞത്. മുഖപ്രസംഗം വായിച്ചില്ലെന്ന് പറഞ്ഞ് മുതിര്‍ന്ന നേതാവ് രമേശ് ചെന്നിത്തലയും ഒഴിഞ്ഞുമാറി. പാപം ചെയ്യാത്തവര്‍ കല്ലെറിയട്ടെയെന്ന തലക്കെട്ടോടെയായിരുന്നു ഇന്നത്തെ വീക്ഷണം മുഖപ്രസംഗം.
രാഹുല്‍ മാങ്കൂട്ടത്തില്‍ രാഷ്ട്രീയ ഗൂഢാലോചനയുടെ ഇരയാണ് എന്നാണ് കോണ്‍ഗ്രസ് മുഖപത്രത്തില്‍ പറയുന്നത്. കഴുത്തോളം മാലിന്യത്തില്‍ മുങ്ങിനില്‍ക്കുന്ന സിപിഐഎം കോണ്‍ഗ്രസിന്റെ കുപ്പായത്തില്‍ തെറിച്ച ചാണകത്തുളളി കണ്ട് മൂക്കുപൊത്തുന്നത് പോലെ രാഹുലിനെ ചൂണ്ടിക്കാട്ടി കോണ്‍ഗ്രസിനെതിരെ സദാചാര പ്രസംഗം നടത്തുകയാണെന്ന് വീക്ഷണം വിമര്‍ശിക്കുന്നു.
Content Highlights: Veekshanam MD Jaison Joseph Said failure happend ineditorial support of rahul mamkootathil